Die Vryheidsfront Plus (VF Plus) het die Regering ‘n druip-punt van 40% vir sy werkverrigting die afgelope jaar gegee.
Dr. Pieter Mulder, leier van die party en die adjunk-minister van Landbou, Bosbou en Visserye, sê die punt is saamgestel uit ‘n opname wat onder sy party se kiesers en lede gedoen is.
In dié opname het die kiesers en lede spesifiek die prestasies van agt afdelings van die Regering uitgewys wat volgens hulle belangrik is. Mulder sê daar is nie ‘n punt aan die Departement van Landbou, Bosbou en Visserye toegeken nie, aangesien die departement nie in die opname genoem is nie.
Departemente ter sprake
Die departemente wat ter sprake is is, is die Departemente van Polisie, Plaaslike Regering en Tradisionele Sake, die Departemente van Basiese en Höer Onderwys, die Departemente van Finansies en Ekonomiese Ontwikkeling, die Departement van Gesondheid, die Departement van Mynwese, die Departement van Energie, en die Departement van Waterwese en Omgewingsake.
Mulder sê die departemente is getakseer en nie die betrokke ministers nie, aangesien sommige ministers onlangs in hul post ingetree het en omdat ‘n hele departement se prestasie nie net aan een individu gekoppel kan word nie.
Die punte
Vir misdaadbekamping is die ANC se punt van vier uit 10, na vyf uit 10 verhoog, maar Mulder sê dit is met ‘n wag-en-sien-houding toegeken, aangesien baie probleme nog bestaan.
Wat finansies en die ekonomie betref, is die punt van vier uit 10 na ses uit 10 verhoog weens die gunstige elemente wat die afgelope jaar ten opsigte van die Wêreldbeker-sokkertoernooi en die verligting van die resessie voorgekom het.
Die situasie rondom suur mynwater asook die onbeholpe bestuur van die Departement van Mynwese het hulle ‘n punt van vier uit 10 besorg.
Die Departement van Energie het drie uit 10 gekry vir die kragprobleme en swak beplanning rakende Eskom wat die afgelope jaar voorgekom het.
Met alles wat die jaar rakende water, suur mynwater en besoedeling aan die lig gekom het, het die Departement van Waterwese en Omgewingsake drie uit 10 gekry.
Die landbou in 2010
Mulder meen dat die landbou in 2010 ‘n “baie op en af jaar beleef het”. Hy sê die verskeie uitsprake wat gemaak is, het die situasie ook nie vergemaklik nie.
“Ons moet egter leer om te onderskei tussen beleid en debat, want van die uitsprake wat Julius Malema en selfs die minister gemaak het, is nie noodwendig die Regering se beleid nie.”
Hy moedig almal aan om saam te werk om die land te verbeter. “As dié skip sink, gaan ons saam. Probeer jy dinge beter maak, of staan jy passief?”
9 Desember 2010
