Vier mans het te voet van mnr. Johan van Rensburg van Baltimore se plaas af gevlug ná hy doodgeskiet is. Dít is die getuienis van ‘n groep Amerikaanse jagters wat op die plaas tuisgegaan het tydens die voorval wat Woensdagnag, 20 Junie plaasgevind het.
“Die vermoede bestaan egter dat die mans tot by die grootpad gehardloop het, waar hulle deur ’n voertuig opgelaai is, ons kan dus na vyf of ses verdagtes kyk op die ou end,” vertel kol. Ronel Otto, woordvoerder vir die polisie in Limpopo.
Otto sê vyf mans is Donderdag, 21 Junie 2012, na ’n plaaslike polisiekantoor geneem vir ondervraging, maar hulle kon nie met die moord verbind word nie en is vrygelaat.
Luidens ’n berig in Beeld het die 77-jarige Van Rensburg tydens die aanval tuis aangesterk nadat hy verlede week ‘n breukoperasie ondergaan het. Mnr. Hanno van Rensburg, sy seun, sê Van Rensburg het suurstof gebruik. Hy is in die sy geskiet en het glo nie wakker geword voordat die eerste skoot hom getref het nie. Me. Glodien van Rensburg is drie keer in die kop en nek geskiet en Hanno vertel dat hulle nie seker is of sy gaan oorleef nie.
'Hulle wil oorlog maak'
Intussen het Hanno die rede vir sy pa se moord voor die deur van die ANC-Jeugliga gaan lê. “Die ANC-jeugliga sê hulle wil ons grond met geweld vat en oorlog maak. As hulle wil oorlog hê, moet hulle kom, ons sal ook oorlog maak. My familie se bloed lê op hierdie grond.”
Hanno se opmerking volg op uitsprake van mnr. Ronald Lamola, ondervoorsitter van die ANC-Jeugliga, wat hy Dinsdag by die Durbanse Universiteit van Tegnologie gemaak het - “wetgewing so kragdadig soos oorlog is nodig om grond terug te gee aan die meerderheid Suid-Afrikaners, want dit is met geweld van hulle afgeneem”.
Mnr. Henry Geldenhuys, ondervoorsitter van die TLU SA, sê ook Lamola se uitsprake kan as ’n aansporing vir die aanval in Baltimore gesien word. “Daar bly niks anders vir boere oor as om ons vir ’n oorlog voor te berei nie.”
Bron: Beeld
