Die vierde Vrystaatse boer vanjaar is die afgelope week op sy plaas naby Warden vermoor, sê Vrystaat Landbou (VL).
Mnr. Kobus Breytenbach, voorsitter van die organisasie se komitee vir wet en orde, sê die voorval was die tiende plaasaanval wat tot dusver vanjaar in die provinsie voorgekom het.
Hy sê mnr. Christiaan van Wyngaard, die slagoffer, het nie aan die organisasie behoort nie, maar hy veroordeel enige plaasmoord. Volgens Breytenbach is dit belangrik dat boere deel moet raak van inisiatiewe rondom gemeenskapsveiligheid sodat hulle ‘n netwerk het vir beskerming.
Begelei deur wag
Kol. Christopher Mophiring, polisiewoordvoerder, sê dinge het Dinsdagmiddag (26 Oktober) soos normaal op die plaas verloop. Die 43 jarige Von Wyngaardt se 55 jarige vrou, Marie, het die middag van die dorp af by die huis aangekom en “die sekurteitswag by hul veiligheidshek het haar na die huis begelei, waarna hy Von Wyngaardt oor ‘n tweerigtingradio ingelig het dat sy veilig by die huis was. Von Wyngaardt was glo nog by sy kantoor.”
Volgens Mophiring het die sekuriteitswag en die plaaswerkers daarna huis toe gegaan.
Die volgende oggend
“Met inkloktyd die volgende oggend het die werkers op die egpaar afgekom. Die vrou het op die sitkamerbank gelê waar sy vasgebind was, en Von Wyngaardt se liggaam is op hul bed gevind, waar hy verskeie kere met ‘n skerp voorwerp gesteek is.”
Mophiring sê die Polisie is op soek na ‘n onbekende aantal verdagtes. “Ons is nog nie seker wat tydens die voorval gebeur het nie, aangesien net die boer vermoor is en niks uit die huis gesteel is nie.”
28 Oktober 2010
