Suikerrietkwekers, veral dié op kleiner skaal, is afhanklik daarvan om volle betalings so gou moontlik te ontvang nadat hulle hul oeste by meulens gelewer het vir persing. Hoewel dit sedertdien opgelos is, het die stryd deur die kontantarm Tongaat Hulett Sugar om sy duisende suikerrietverskaffers in die laaste helfte van verlede jaar vir hul oeste te betaal, groot kommer onder produsente en die res van die bedryf veroorsaak.
Die leiers van twee verenigings wat die belange van Suid-Afrika se suikerrietkwekers verteenwoordig, het afsonderlik aan Landbou.com gesê dat ’n KwaZulu-Natalse suikermeule in onafhanklik besit vir ’n kort tydperk ná die verwoestende April 2022-vloede in dié provinsie ook gesukkel het om sy suikerrietverskaffers te betaal.
“In Suid-Afrika lewer produsente hul suikerriet by ’n meule af en ontvang eers gemiddeld 45 dae later betaling vir daardie aflewering. Nie- of laat betalings beteken dat produsente nie in staat is om hul finansiële verpligtinge teenoor hul krediteure, personeel, plaaswerkers en ander diensverskaffers na te kom nie. Dit kan vinnig ’n domino-effek van finansiële nood regdeur die waardeketting veroorsaak,” sê dr. Thomas Funke, uitvoerende hoof van die SA Rietwekersvereniging.
