Die virtuele bestuur van vee vanuit ’n boer se kantoor gaan vorentoe moontlik word sodat hy feitlik alles vanuit sy kantoor sal kan hanteer, sê mnr. Izak du Plessis, senior diereproduksiespesialis van Senwes.
Hy was ‘n spreker op Agri Noordwes se Jongboerkonferensie.
Du Plessis sê sulke toerusting word tans ontwikkel. Die boer sal byvoorbeeld met behulp van GPS (globale posisionering met behulp van satelliettegnologie) en monitors virtuele kampe in ’n stuk veld of weiding kan skep om die vee sonder grensdrade te beheer, alles vanuit sy kantoor.
Hy sê by veeboerdery gaan presisieboerdery egter nie net oor tegnologie nie, maar veral oor beplanning, rekordhouding, weidings- en voedingsbestuur, reproduksie, siektebestryding en teling.
Bepaalde aksies moet behoorlik beplan en tydig uitgevoer word, soos wisselweiding en bemarking van diere, veral in ’n droogtejaar soos vanjaar waarin menige boer min winterweiding het.
Voedingsbestuur is die kern van presisieboerdery in veeboerdery. Diere verskil gedurende verskillende stadiums van reproduksie en volwassenheid van mekaar en die voeding moet dienooreenkomstig aangepas word, verkieslik in afsonderlike groepe.
26 April 2102
