Biosekuriteit is die grootste uitdaging wat die rooivleisbedryf in die toekoms gaan beïnvloed, sê mnr. Dave Ford, voorsitter van die Rooivleisbedryfsforum.
Ford was een van die sprekers by die Rooivleisprodusente-organisasie (RPO) se nasionale jaarkongres in Magaliesburg.
Die uitbreking van veesiektes, die vang van vee deur roofdiere en die bewaring van wild, die Waterwet en die gebruik van water, asook dieregesondheid is van die faktore wat Ford gelys het wat tot dié uitdaging kan bydra.
Ford sê openbare gesondheid en veeartsenykundige gesondheidsdienste is bykomende faktore. “ ’n Voorbeeld is, tot onlangs was slegs twee van die slagplase in Limpopo geregistreer om te slag vir menslike verbruik.”
Omgewingsbewusmaking
Volgens Ford raak verbruikers meer en meer omgewingsbewus, en wil meer inligting hê oor hoe die diere waarvan hulle die vleis koop, op die plaas hanteer is.
“Verwag ook meer veldtogte soos die ‘meat free Mondays’-inisiatief wat vir omgewingsbewaring en die beperking van klimaatverandering geskep word. Dit gaan die bedryf ook beïnvloed.”
Leer ken die moderne verbruiker
Hy meen verbruikers fokus deesdae meer op hul gesondheid hoewel hulle “hap-en-hol”-eetgewoontes het, en die bedryf sal dit in ag moet neem.
Hy sê die feit dat die meeste verbruikers, veral in stedelike gebiede, oor hul veiligheid begaan is, veroorsaak ook uitdagings vir die bedryf. “Dit beteken hulle eet nie in die aande meer baie in restaurant nie, en bly in sekuriteitskomplekse waar hul huise klein is en hulle nie baie kanse kry om op groot skaal byvoorbeeld ‘n braai te hou nie. Dít moet alles ook in ag geneem word.”
16 September 2010
