Die stad van Kaapstad se veldtog om een vleislose dag per week te ondersteun het gister weer pak slae gekry by ‘n geleentheid op Worcester waar die Wes-Kaapse kabinet met die landboubedryf ontmoet het.
Mnr. Gerrit van Rensburg, provinsiale minister van landbou, het ‘n beroep op ryk mense gedoen wat so ‘n keuse wil uitoefen om eerder op Maandae hul vleis vir armes te gee, maar om nie op te hou om vleis te koop nie.
“Ek wonder wat hulle gaan sê as ons ‘n dag afkondig waar niemand besigheid mag doen nie?”
Volgens mnr. John Durr, Wes-Kaapse voorsitter van die Rooivleisprodusente-organisasie, sluit die veldtog nie net rooivleis in nie, maar alle diereproteïen. Hy meen dit kan ‘n verwoestende impak op voedselsekuriteit en die welstand van die bedryf hê.
Kaapstad is een van sewe stede in die wêreld wat die organisasie vir medelye in die wêreld se boerderye (CWIF) se veldtog van een vleislose dag per week ondersteun. Kapenaars moet eerder vrugte, groente en graan eet. Volgens CWIF is dit nodig vir die welstand van diere, die gesondheid van mense en om klimaatverandering te beveg.
Die besluit is in Julie afgekondig, maar groot ongelukkigheid heers omdat die vleisbedryf nie in die saak geken is nie.
“Ek doen ‘n beroep op die stad om ons tog daarin te ken as hy só ‘n besluit neem. Ons kan nie toelaat dat ons mekaar seermaak nie.”
Hy meen die organisasie se statistiek rondom die hoeveelheid water wat nodig is om ‘n kilogram vleis te produseer, is “twak”.
“Daar gaan so baie mense dood aan ‘n proteïentekort. Ons sal dié saak op die hoogste vlak moet bespreek.”
11 November 2010
