Die feit dat mnr. Koot Claassen ál sy grond in Mpumalanga verkoop het, is 'n "tipiese voorbeeld" van wat besig is om te gebeur weens mynboubedrywighede.
Só sê mnr. Hans van der Merwe, uitvoerende direkteur van Agri SA.
Van der Merwe sê hy is glad nie verras daarmee dat Claassen, voorsitter van Mpumalanga Landbou, ál sy grond verkoop het en Wes-Kaap toe skuif nie.
"As ’n mens na die kaart van Mpumalanga kyk, is daar bykans nie meer ’n stukkie grond waarop nie reeds gemyn óf ’n mynboulisensie toegestaan is óf ’n aansoek om een ingedien is nie.
“Dit is grond met van die beste landboupotensiaal in die land wat vir die landbou verlore gaan. Die vloedgolf van mynregte wat toegestaan word, is skrikwekkend. As dit só aangaan, sal dit nie lank duur voor die hele Loskopskema ook tot niet is nie.”
Mededinging
Van der Merwe sê daar is verlede jaar op Mpumalanga Landbou se kongres al sterk debat gevoer oor die mededinging tussen die mynbou en die landbou waarin die mynbou voorrang geniet. Daar word gepoog om die gevare onder politici se aandag te bring.
“Dit is nie net die bogrond wat vernietig word nie, maar ook die waterbronne wat besoedel word. Dit is beslis nie in die land se belang op lang termyn nie.” Agri SA beoog om binnekort ’n konferensie oor mynregte te hou.
Mnr. Leon van Rooyen, ondervoorsitter van Mpumalanga Landbou, het in ’n brief aan Landbouweekblad gesê sy organisasie is ook uiters bekommerd oor die “kumulatiewe uitwerking” van onbeheersde en selfs onwettige mynbou op eiensdomsreg, die omgewing en voedselsekerheid.
26 Maart 2012
