Voedselinflasie het volgens die buro vir voedsel- en landboubeleid (BFAP) se jongste syfers waarskynlik ’n hoogtepunt in Julie bereik. Dit sal moontlik momentum begin verloor namate globale kommoditeitspryse daal en vooruitsigte vir die wisselkoers verbeter.
Volgens BFAP se syfers was die inflasie vir voedsel en nie-alkoholiese drankies 1,1% hoër vergeleke met Junie, en 9,7% hoër vergeleke met die ooreenstemmende tydperk verlede jaar. As gevolg daarvan het die verbruikersprysindeks met 1,7 persentasiepunte toegeneem tot 7,8%.
BFAP het bevind dat verbruikers vergeleke met verlede jaar veral meer betaal vir brood en grane (13,7%), asook olies en vette (36,2%). Die pryse in die kategorie vir vrugte het egter gedurende hierdie tydperk met 1,4% gedaal, terwyl groentepryse met 8,3% gestyg het.
