Kopers en verkopers van lewende hoenders het tot dusver optimisties gereageer op die Regering se instelling van vereistes vir hul bedrywighede. Dié voorwaardes is daarop gemik om te help keer dat die hoogs aansteeklike H5N8-voëlgriepvirus verder in die land versprei, nadat dit op twee kommersiële plase uitgebreek het.
Die Regering het eers 'n algehele verbod op die verkoop van lewende hoenders geplaas, maar dit is ná gesprekke met die bedryf met voorwaardes vervang, sodat diegene wie se lewensbestaan daarvan afhang, steeds sake kan doen. Dr. Ziyanda Majokweni, direkteur van die Bestuursagentskap vir Pluimveesiektes (PDMA), het aan Landbouweekblad gesê die reaksie van sowel boere (verkopers) en handelaars (kopers) was tot dusver baie goed.
Vereistes
Enigeen wat met meer as vyf lewende hoenders handel dryf, vir enige ander doel as regstreekse slagting by 'n geregistreerde slagplaas, moet die volgende voorwaardes nakom:
- Die verkopers, kommersiële boere inkluis, asook die handelaars wat die hoenders koop en verkoop, moet by die PDMA registreer. Dit is 'n eenmalige registrasie wat jaarliks hersien sal word. Dit behels tans die invul van 'n vorm, maar 'n aanlynproses gaan ontwikkel word. Die agentskap, 'n onafhanklike organisasie, sal rekord hou en inligting vertroulik hou;
- Verkopers en kopers het 'n verantwoordelikheid om toe te sien dat die ander party geregistreer is;
- Boere mag net lewende hoenders verkoop as 'n veearts of dieregesondheidstegnikus 'n sertifikaat uitgereik het dat dit gesond is. Hulle moet dié reëlings self tref; en
- Handelaars mag net gesonde hoenders verkoop en moet voorgeskrewe rekords hou. Hulle moet maandeliks 'n rekonsiliasievorm by die PDMA indien.
Naspeurbaarheid
Majokweni sê die maatreëls is op naspeurbaarheid gemik. “As ons só rekord hou, is dit moontlik om na te spoor waar (lewende) hoenders vandaan kom en waar dit verkoop word, wat owerhede in staat stel om siekte-uitbrake te bestuur.”
Die hele bedryf sal baat by die voordele van die maatreëls, sê sy. “As alle rolspelers die maatreëls nakom, sal dit help om siektes soos voëlgriep en Newcastle-siekte te beheer. Dit beteken almal in die bedryf sal sonder beperking kan handel dryf en die beter beheer van siektes sal tot die oopstelling van nuwe markte bydra.”
Majokweni sê die gedagte is dat die maatreëls in plek sal bly, onderhewig aan verbeterings aan die stelsel wanneer nodig.
Navrae: Kontak die PDMA by tel. 012 529 8298 of webwerf poultrydiseases.co.za.
