Ondanks die uitbreking van voëlgriep in Suid-Afrika, sal die Europese Unie steeds behandelde volstruisvleis uit Suid-Afrika invoer.
Dié goeie nuus vir die volstruisbedryf kom nadat die H5N8-virus reeds twee groot hoenderproduksieplase in Mpumalanga getref het. Meer as 400 000 hoenders moes doodgemaak word.
Dr. Mike Modisane, hoofdirekteur van diereproduksie en -gesondheid by die Departement van Landbou, Bosbou en Visserye, het aangedui dat die hoogs aansteeklike Avian Influenza-virus (AI) deur hitte onaktief gemaak kan word.
Handel
Regoor die wêreld is daar konsensus dat wanneer dié produkte behandel word om die virus onaktief te maak, daar steeds met dit handel gedryf kan word.
Dieselfde geld ook vir ander pluimveeprodukte wat behandel word om die virus onaktief te maak.
Modisane is ook die voorsitter van die Vergadering van Afgevaardigdes van die Wêreldorganisasie vir Dieregesondheid (OIE).
Hy het dié bevestiging oor hitte-behandelde pluimveeprodukte van die kommissaris van die Europese Unie (EU) verkry.
