Europa is, as uitvoermark, ’n historiese pretpark weens sy bevolking wat al hoe ouer word is, sê dr. Tobias Doyer, uitvoerende hoof van Santam Landbou.
Hy het op die Melkprodusente-organisasie se kongres in Johannesburg gesê Asië, die Midde-Ooste en Afrika bied egter goeie geleenthede. “As ’n mens kyk na die lewensverwagting van Wes-Europa en Amerika, gaan dié streke nog lank babelas hê van die ekonomiese krisis.”
Die voordeel wat dit vir Suid-Afrikaanse produsente kan inhou, is dat Europa moontlik nie meer sulke groot subsidies sal kan bekostig nie. “Die nadeel sal na vore kom sodra dié lande begin om hul eie markte te beskerm.”
Tans is Asië een van die markte wat goeie uitvoergeleenthede bied. “Wat kan ek sê? China is enorm. Sit dan nog die Indiese, Singapoer- en Hongkong-mark daarby. In die toekoms kan dit selfs oorweeg word om na ’n enkele stad uit te voer bloot omdat daar soveel mense daar woon.”
Die Midde-Ooste bied ook groot uitvoergeleenthede. “Daar is baie olie, maar min water.” Doyer sê daar is dalk heelwat steun beskikbaar vir uitvoer na Afrika suid van die Sahara, maar daar is min verbruikers in dié wêreldstreek.
30 Augustus 2010
