Die volstruisbedryf is moedeloos nadat uitvoer verlede week, te midde van die besigste tydperk van hul uitvoertyd, weer gestaak is.
Mnr. Anton Kruger, hoof uitvoerende beampte van die Volstruisbesigheidskamer, sê die boere is baie gefrustreerd, veral omdat die bedryf se vleisuitvoer na Europa tussen Oktober en Maart bykans verdubbel.
“Hoe langer die status opgehef is, hoe slegter gaan dinge raak. Die boere is baie gefrustreerd, bekommerd en hul kontantvloei is onder geweldige druk.” Kruger sê nadat die H5N2-virus verlede week op ’n plaas in die Oos-Kaap bevestig is, is die Europese Unie se vroeëre besluit om volstruisuitvoer buite die Klein-Karoo-gebied te hervat, vir eers teruggehou.
Die bedryf se verliese sedert die uitbreking van die virus in April vanjaar staan tans op R864 miljoen, met ’n gemiddelde maandelikse inkomste wat op R108 miljoen bereken is.
Rakspasie
Kruger sê boere is tans nie net bekommerd oor die inkomste wat hulle verloor en die werksgeleenthede wat verlore gaan nie. “Ons is ook bekommerd oor die rakspasie wat ons op die Europese mark misloop, en wat later weer met baie werk teruggekry sal moet word.”
Volgens Kruger hoop hulle dat die Regering nou so vinnig moontlik met die EU kan praat, sodat hul mening oor die situasie en die moontlike herinstelling van uitvoer verkry kan word.
Hy sê hulle wag intussen om meer van die Regering te hoor oor die bedryf se rampverklaringsaansoek. Die Land Bank behoort ook binnekort antwoorde te kan verskaf oor hul aansoek om lenings teen laer rentekoerse.
8 November 2011
