"Dit is ’n probleem dat plantaardige produkte, wat dikwels nie enige vorm van suiwel bevat nie, onder die titel ‘melk’ verhandel word,” het mnr. Fanie Ferreira, waarnemende uitvoerende hoof van die MPO, by die Landbouskool Oakdale op die jaarvergadering van die Wes-Kaap MPO gesê.
Sulke produkte word dikwels in koelkaste en op rakke saam met natuurlike melkprodukte vertoon. Dit verwar die verbruiker wat glo dit is ’n natuurlike suiwelproduk. Sowat 30 jaar gelede toe hierdie produkte die eerste keer op die plaaslike markte verskyn het, is dit as alternatiewe produkte bemark. Dit het geleidelik verander en sulke produkte word nou dikwels saam met natuurlike suiwelprodukte aangebied. Melkproduksie daal omdat die verbruiker nie onderskei tussen egte suiwel- en alternatiewe produkte nie, en laasgenoemde koop asof dit egte suiwel is.
In ’n ondersoek in Pretoriase kettingwinkel is soortgelyke ingevoerde Italiaanse produkte gevind, maar die produkte is duidelik gemerk as ’n “drankie” en nie “melk” nie. “Ons het êrens agterweë gebly om dit ook plaaslik te doen, want die produkte word dikwels nie van natuurlike melkprodukte op winkelrakke geskei nie,” het hy gesê.
