Die vraag na sybokhaar in China is baie traag, wat ’n ongunstige invloed op die mark het en die bedryf met vrae laat.
Mnr. Deon Saayman, hoofbestuurder van Sybokhaar Suid-Afrika, sê in China daal die vraag na sybokhaar tradisioneel tussen Augustus en Oktober, soms tot November, elke jaar. “Maar dit is vir ons vreemd dat die vraag nog nie begin verbeter het nie.”
Volgens Saayman hou die Chinese kopers die mark dop om te sien waar hulle kan inkom om teen laer pryse aan te koop, maar hy sê die trae gedrag is buitengewoon. “Die vraag in die modehuise is steeds daar. Alles in die teorie dui daarop dat ’n sterk vraag moet voorkom.”
Mededinging
Luidens die jongste markverslag het ’n tekort aan mededinging van al die kopershuise op die vyfde veiling van die winterseisoen op Dinsdag (1 November 2011) voorgekom. ’n Swakker vraag is vir sterker kleinbokkiehaar aangeteken, wat die markaanwyser vir kleinbokkiehaar afgetrek het.
Verder het die pryse vir grootbokke se fynhaar met 3,5% gedaal, terwyl pryse vir jongbok-winterhaar met 1% gestyg het.
Die hoogste prys van R230 per kilogram is vir ’n baal 26 mikron goeie styl winterkleinbokkiehaar betaal. ’n Gemiddelde markaanwyser van R87,33 is behaal.
2 November 2011
