Die onbepaalde verhoging van beurtkrag tot fase 6 op 19 Februarie werp ’n skadu oor die regering se spogsessie drie dae vantevore oor vordering met sy “energie-aksieplan”.
Die landbousektor het voorheen gewaarsku fase 6 is onhoudbaar vir produsente en plaas onaanvaarbare druk op die sektor. Daarom is gesprekke en prosesse aan die gang om die sektor as noodsaaklik te verklaar binne die nasionale ramptoestand vir die kragkrisis.
Volgens mnr. Nicol Jansen, ondervoorsitter van Agri SA, word daar reg oor Suid-Afrika in provinsies met Eskom-takke gepraat om moontlikhede te ondersoek om die landbou tegemoet te kom met beurtkragvlakke.
