Hy het op 12 Januarie in die Medi-Clinic op Stellenbosch gesterf ná ’n beroerte.
De Klerk het as navorsingstegnikus by Nietvoorbij navorsing gedoen oor die eienskappe en bestryding van wingerdplae. Vir sy MSc- en PhD-studie het hy veral op filloksera en margarodes konsentreer. As deel hiervan is die plaaslike margarode-spesies herbeskryf, twee nuwe spesies is ontdek en beskryf, en die resultate het in nege wetenskaplike publikasies verskyn.
De Klerk het ook internasionale erkenning as wetenskaplike geniet. Hy het onder meer as spreker opgetree by die eerste filloksera-kongres in Australië en twee weke lank by die Brasiliaanse wingerdbou-instituut leiding gegee met margarode-navorsing. Hy het ook referate by verskeie internasionale kongresse gelewer.
De Klerk het ’n groot rol gespeel in die bestuur van die Landbounavorsingsraad Infruitec-Nietvoorbij. Hy was adjunkdirekteur en hoof van die plantbeskermingsafdeling. Hy was die stigter en voorsitter van verskeie komitees, onder meer by die wyn-en-spiritusraad, die Wyndruifverbeteringsvereniging en die Sagtevrugteplantverbeteringsvereniging. Hy was ook ’n stigterslid van die IPW-skema (geïntegreerde produksie van wyn).
Ná sy aftrede het hy as onafhanklike private konsultant met navorsing voortgegaan.
De Klerk word oorleef deur sy vrou, Annette, vier kinders, Chris, Pierre, Anriëtte en Adéle, asook twee skoondogters, ’n skoonseun en vyf kleinkinders. Die familie het hom privaat begrawe.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
