’n Kennisgewing dat glas moontlik in verpakkingsmateriaal vir vrugte voorkom, is nie rede tot paniek nie, sê Hortgro Dienste.
Mnr. Anton Rabe, uitvoerende direkteur van Hortgro Dienste, sê: “Dit is nie nodig om paniekerig te raak nie. Die probleem sal ’n paar weke se vrugte wat verpak is, moontlik raak en vir ’n paar weke se ontwrigting sorg, maar daar is min risiko. Ons het sover nog geen probleme opgemerk nie.”
Die groep het luidens ’n vroeëre verklaring gesê Huhtamaki SA, wat die bedryf van ’n pulp van herwinde papier voorsien, het ’n kennisgewing uitgestuur oor die moontlike voorkoms van stukkies glas in sommige houers. Dit het betrekking op produkte wat tussen 12 September 2011 en 7 Maart 2012 gelewer is.
Rabe sê die bedryf kon voorkomend optree. Die besendings vrugte wat wel moontlik geraak word, word eenkant gehou sodat dit vir veiligheid herverwerk of vernietig kan word.
Uitvoere?
Volgens Rabe sal die probleem ’n uitwerking op uitvoer hê, “maar dit is moeilik om te sê wat dié impak sal wees.” Hy sê as aanvaar word dat al die vrugte wat moontlik geraak kan word, vernietig moet word, kan dit ’n verlies van tot R380 miljoen tot gevolg hê. “Maar dit is die ergste moontlike scenario. Ons meen dit is aansienlik minder.”
Die probleem en die isolering, en moontlike herverwerking van verpakte vrugte wat geraak kan word, gaan volgens Rabe wel vir ’n paar weke ontwrigting veroorsaak. Hy sê dit is tans hoogseisoen.
Geplukte vrugte moet in pakhuise verpak word en na markte en skepe toe gaan. Die produkte wat eenkant gehou word, kan haakplekke veroorsaak.
Rabe sê verskaffers en ander belanghebbendes doen alles moontlik om die beste produkte te lewer, maar hulle het Huhtamaki reeds gewaarsku dat eise ingestel gaan word. “Eise gaan ingestel word. Die bedryf kan en gaan nie die koste dra nie.”
’n Onafhanklike ondersoek na die voorval is aan die gang.
16 Maart 2012
