Vrystaat Landbou het in September vanjaar twee veiligheidsrisiko-analiste, dr. Jane Buys en mnr. Gernie Botha, in diens geneem om die lessenaar te bestuur en stel die ondersteuningsgebaar van OVK hoog op die prys.
Volgens die statistiek wat die lessenaar al uit mediaberigte en ander bronne kon insamel, is daar ’n opwaartse tendens wat betref die aantal insidente op plase en/of kleinhoewes gedurende September en Oktober vanjaar vergeleke dieselfde tydperk verlede jaar. Gedurende 2013 is drie insidente aangemeld waarin landbouers, hul families en/of werkers deur misdadigers aangeval is. Tydens dieselfde tydperk in 2014, het 10 insidente voorgekom. Dit blyk ‘n toename van 70% te wees.
Dit wil voorkom asof die oorgrote meerderheid van die onlangse insidente in die provinsie (sowat 50%) meerendeels op Maandae en Dinsdae voorgekom het, met sowat 50% daarvan tussen 19:00 en 23:00. Wat onrusbarend is, is die groot aantal verdagtes betrokke by die insidente. In 70% van die gevalle was groepe van tussen vier en nege verdagtes betrokke. In die kalenderjaar van 2013 het 29 insidente plaasgevind, terwyl 33 insidente alreeds teen Oktober 2014 vir die provinsie aangeteken is. Dít verteenwoordig ’n toename van 12.12%.
Die brutaliteit waarmee die meeste van die misdade gepleeg word, plaas weereens die fokus op die erns van die saak. In die helfte van insidente roof misdadigers geld, gevolg deur selfone en vuurwapens, wat in 30% van insidente voorgekom het. Landbouers moet dus daarop let om nie groot hoeveelhede geld in hul huise aan te hou wat hulle sodoende blootstel as teikens vir opportunistiese misdadigers nie.
Die OVK-groep se bedieningsgebied strek oor onder meer die Vrystaat asook langs die Lesothogrens, en landbouers en OVK se kliënte se veiligheid is vir die onderneming ’n prioriteit. “OVK weet watter goeie werk Vrystaat Landbou saam met die nodige strukture verrig om landbouers te beveilig. Dit is dus vir die OVK-groep ’n voorreg om by Vrystaat Landbou betrokke te wees om hul behulpsaam te wees om hul werk tot volle potensiaal voort te sit,” aldus mnr. Stefen Oberholzer, besturende direkteur van die OVK-groep.
Vrystaat Landbou en OVK wil graag landbouers aanmoedig om paraat te wees tydens die Feestyd, en om te onthou dat hulle eerste verantwoordelik is vir hulle eie veiligheid. “Wees waaksaam tydens die Feestyd, ook as familie en vriende kom kuier, en doen alles moontlik om julle veiligheid te probeer verseker,” aldus Vermeulen en Oberholzer.
Op die foto verskyn mnre. Stefan Oberholzer, besturende direkteur van OVK-groep, Henk Vermeulen, hoofbestuurder van Vrystaat Landbou en Manie Botha, voorsitter van die direksie van die OVK-groep, by die oorhandiging van die bakkie.
