Die besluit om ’n padinstandhoudingstoelae van R45,2 miljoen aan die Vrystaat te skrap, kom te midde van die toenemende agteruitgang van die Vrystaatse padinfrastruktuur, sê mnr. Francois Wilken, voorsitter van Vrystaat Landbou (VL).
“Die minister van finansies het dié besluit om onbekende redes op 25 Februarie geneem.”
Luidens tesourie-kennisgewing nr. 1794 is hierdie geld ingevolge die Wet op Verdeling van Inkomste aan ander provinsies hertoegewys.
“Die besluit is roekeloos en onaanvaarbaar,” sê Wilken. “Oorstromings gedurende die 2021-’22-reënseisoen het nie net boere se oeste verwoes nie, maar ook die Vrystaatse padinfrastruktuur.”
Volgens Wilken sal die landelike gemeenskappe uiters teleurgesteld wees oor die besluit. “Ons sal die minister formeel versoek om die redes hiervoor te verduidelik en die uitwerking daarvan op die landbou en landelike gemeenskap uitlig.”
