‘n Oos-Vrystaatse vrugteboer is as die Departement van Landbou, Bosbou en Visserye se nasionale Vroueboer van die Jaar aangewys.
Mev. Pam Fyvie van die plaas Deveron buite Harrismith boer met onder meer 60 ha appels onder skadunet en 20 ha bloubessies en swartbessies.
‘n Oorstelpte Fyvie, ook wenner in die kategorie vir uitvoer-vroueboere, het tydens die oorhandiging in die Mittah Seperepere-konvensiesentrum in Kimberley totale prysgeld van R750 000 van Minister Tina Joemat Pettersson en haar adjunk, dr. Pieter Mulder, ontvang.
Mev. Sizakele Khumalo, presidentsvrou, het ook die geselligheid bygewoon.
Vroueboere en ‘n vroue-plaaswerker is in sewe kategorieë deur die departement vereer, van bestaansboere tot kommersiële boere. Prysgeld in die onderskeie kategorieë het van R100 000 tot R500 000 gewissel.
Fyvie bedien ‘n unieke nismark omdat haar appels danksy die Oos-Vrystaatse koue elke seisoen twee tot drie weke vóór die Wes-Kaapse produk op die winkelrakke in Europese en Oosterse uitvoermarkte is.
Die appels word ook na ander Afrika-lande uitgevoer. Fyvie het onlangs ‘n versappingsaanleg by haar boerdery gevoeg, waar appels wat nie vir uitvoer geskik is nie in sap verwerk word.
Die bessies word binnelands bemark, aan kopers soos Woolworths, die Shoprite-groep se Freshmark, en op die Johannesburgse varsproduktemark.
Fyvie boer al sedert 1991 saam met haar man, Neil, op hul plaas.
Sy was ook baie opgewonde dat een van haar werkers, me. Cindy Radebe, as vanjaar se Vrystaatse Vroue-plaaswerker van die Jaar aangewys is. Radebe het as koolplanter op die plaas begin, en haarself opgewerk tot waar sy vandag administrasie en duisende rande se verkope in die kantoor behartig, sê Fyvie.
25 Maart 2012
