Die Cape Premier-veiling van jaaroue vullens het Donderdag (26 Januarie 2012) op ’n hoë noot afgeskop toe nie minder nie as nege renperde elk vir ’n R1 miljoen of meer opgeveil is.
Die veilingomset vir die eerste 150 lotte was sowat R5 miljoen meer as vir die eerste 150 lotte wat verlede jaar opgeveil is. Altesame 150 jaaroue vullens het gister onder die hamer gekom. Die veiling gaan vandag voort met nóg 200 lotte.
Nie eers die verbod op uitvoer weens Afrika-perdesiekte kon die kopers se geesdrif demp nie. Die veiling se omset het gisteraand op R49 725 000 gestaan.
Altesame 81% van die perde wat die veilingring ingetrippel het, is verkoop. Die gemiddelde prys wat vir ’n perd betaal is, was R407 582. Die pragperd wat tans voor hardloop in die resies om die hoogste prys, is Magnificent Trip. Afslaer Andrew Miller het die bod op R1,7 miljoen aan Form Bloodstock toegestaan.
Die verkoper was Highlands Farm-stoetery van Robertson. Magnificent Trip kom uit die bekende Trippi (VSA)-bloedlyn.
Die gholflegende Gary Player, wat al meer as 55 jaar in die perdebedryf is, het die veiling geopen. Dit is deur kopers van minstens 15 lande bygewoon.
“Julle is dapper om vandag hier te kom perde koop. Ons besef julle kan nie uitvoer nie, maar ek glo ons sal al heelwat veld gewen het met uitvoer wanneer die babas wat julle vandag hier koop wasdom bereik.”
Hy het ’n beroep op die oorsese kopers gedoen om die plaaslike perdebedryf te ondersteun.
“Ons is ’n klein landjie, ons is die onderdrukte (underdog), ons is die tippie van Afrika, maar ons is ’n vasberade en taai nasie. Aan ons oorsese besoekers: Ons het julle hulp nodig. Julle is die groot nasies van die wêreld, en ons is jul kliënte wat julle ondersteun het deur jul hingste en merries te koop. Al wat ons vra, is dat julle wederkerig handel en ons ook ondersteun.”
Die veiling is deur die Wes-Kaapse regering geborg.
“Hierdie geleentheid is darem nie net ’n perdeveiling nie. Ons skep baie werk en lok baie toeriste in ons bedryf. Dit is ’n noodsaaklike bestanddeel vir ons land, Suid-Afrika,” het Player gesê.
Player het die veiling as “baie spesiaal” beskryf. “Ek het al baie veilings regoor die wêreld bygewoon, maar was nog nooit op ’n veiling wat beter georganiseer is as hierdie een nie.”
27 Januarie 2012
