Die voorgestelde wysigings aan die Wet op die Beheer van Vuurwapens kan geweld teen vroue en kinders vererger, sê die Mediese Navorsingsraad.
Luidens ’n berig in Die Burger (7 Desember 2011) sê dr. Naeemah Abrahams, ’n navorser verbonde aan die raad, dié wysigings moet tot elke prys teengestaan word.
Van die wysigings behels dat die ouderdom vir ’n persoon aan wie ’n lisensie toegestaan mag word, verlaag moet word. Verder stel dit voor dat die aantal vuurwapens per persoon verhoog moet word.
Abrahams, wat Dinsdag (6 Desember 2011) een van die sprekers by ’n bespreking van die veldtog teen geweld teen vroue en kinders by die Saartjie Baartman-sentrum was, sê die instelling van dié wet het gehelp om die aantal misdade met vuurwapens te laat afneem.
Veiligheid
Abrahams sê die opvatting dat vuurwapens vir veiligheid in huise gehou word, is vals. Sy sê as vroue nie met vuurwapens vermoor word nie, word dit gebruik om hulle te intimideer en soms tot onderdanigheid te dwing.
Navorsing het glo bewys dat vuurwapens ’n rol gespeel het in tot 40% van beëdigde verklarings oor geweld wat deur vroue in die Wes-Kaap afgelê word.
Die koerant berig dat in die bespreking ook verwys is na navorsing wat aantoon dat ’n meisie wat in Suid-Afrika gebore word, ’n groter kans het om verkrag te word as om te leer lees.
Vuurwapen nie misdadiger
Intussen sê mnr. André Botha, voorsitter van Agri SA se landelike veiligheidskomitee, as daar na dié wetgewing gekyk word, moet dit altyd in gedagte gehou word “dis nie die vuurwapen wat die misdaad gepleeg het nie.”
Hy sê tweedens moet onthou word dat dié mense wat om ’n wapenlisensie aansoek doen, deur ’n streng keuringsproses moet gaan voor dat dit aan hulle toegestaan word.
“So, as die staat sy werk reg doen en die wet behoorlik toepas, sal vuurwapens nie in die hande van die verkeerde mense beland nie,” verduidelik Botha.
“Dalk moet die Regering begin om hand in eie boesem te steek en te kyk na die verval van ons samelewing, want hy hou aan om verantwoordelike landsburgers aan bande te lê, terwyl sommige misdadigers al hoe meer kanse vat!”
Bron: Die Burger
8 Desember 2011
