Die TLU SA en die Nasionale Waterforum (NWF) beoog ’n landwye aksie om gevalle van waterbesoedeling te dokumenteer en klagte daaroor in te handig by die SA Polisiediens.
Drastiese optrede raak noodsaaklik in die lig van die Departement van Waterwese se volgehoue ontkenning dat waterbesoedeling op ’n krisis afstuur, sê mnr. Louis Meintjes, ondervoorsitter van die TLU SA en voorsitter van die NWF. Ondanks waarskuwings van verskeie wetenskaplikes het me. Nobubele Ngele, waarnemende DG, gesê “die land sal in geen stadium in die toekoms ’n waterkrisis beleef nie”.
Sy maak die waarskuwings af as publisiteitsfoefies of ’n manier om geld te maak en sê suur mynwater het ’n “wa geword vir opportunistiese groepe om op te spring”. Sy het die vakbond Fedusa se dreigement om te staak weens kwessies oor watergehalte, as “bisar” bestempel.
“Die departement hoef net te kyk na wetenskaplike toetse wat op water gedoen is om te besef hoe kommerwekkend besoedeling in die land is,” het Meintjes gesê. Hy sê die departement se houding bevestig dat dit die regte ding was om ’n klag teen die minister te lê oor pligsversuim om waterbronne te beskerm.
Volgens Meintjes het kol. Louis Bester van die direktoraat vir voorrangmisdaad van die SAPD laat blyk dat ’n spesiale ondersoekeenheid die klag ondersoek. “As daar nie vordering is nie, sal ons uiteindelik die Grondwethof nader vir ’n uitspraak oor die besoedeling van waterbronne en die departement se versuim om sy plig in dié verband na te kom,” sê hy.
Die NWF gaan ’n databasis van elke bron van besoedeling met die polisie se saaknommer opbou en klagte aan die ondersoekeenheid deurgee. Strafregtelike klagte word oorweeg of is reeds ingedien teen minstens vier munisipaliteite.
12 Oktober 2010
