“Die staat is inderdaad die openbare trustee van die nasie se waterhulpbronne en die gebruik daarvan, en neem dus gesag daaroor en verantwoordelikheid daarvoor, maar beslis nie eienaarskap nie,” sê mnr. Adriaan Groenewald van Groenewalds Prokureurs, regsverteenwoordiger vir van die landboupartye wat op 25 Augustus hul saak oor die oordraagbaarheid en verhandelbaarheid van watergebruiksregte in die Grondwethof gestel het. Die hof het uitspraak voorbehou.
Die kruks van die saak tussen die departement van water en sanitasie en die landbougebruikers handel oor die interpretasie van artikel 25 van die Nasionale Waterwet (Wet 36 van 1998). Landbougebruikers is van mening dat dit die oordrag van en handel in watergebruiksregte moontlik maak en die appèlhof het hulle gelyk gegee.
Die staat het die appèlhofbeslissing op appèl na die Grondwethof geneem. Die staat voer aan dat die artikel nie vir derde partye voorsiening maak nie, maar Groenewald sê dit sou vreemd gewees het as die wetgewer ’n ander bedoeling met artikel 25 gehad het as landbouwatergebruikers se interpretasie.
