’n Waterkrisis dreig in die Oos-Vrystaat terwyl die Rosendaldam-waterprojek al vir 10 jaar lank voortsleep, sê Vrystaat Landbou (VL).
Die eerste tekens van die krisis word tans op Senekal bespeur, waar inwoners volgens ’n berig in Volksblad die afgelope week droë krane gehad het. Dié probleem is weens ’n gebreekte waterpyp by die Cyferfontein-waterwerke veroorsaak.
Mnr. Thabo Mokhetoa, bestuurder van die Setsoto-munisipaliteit se waterafdeling, sê die watertoevoer is herstel en die dorp het sedert Woensdag (13 Junie 2012) weer water. Hy sê inwoners kan gerus wees oor die watervoorraad vir die komende maande, want voorsorgmaatreëls is getref as waterreserwes opdroog.
Hy sê as dit nodig is, sal water van ander dorpe na Senekal aangery word. Mnr. Mike Odendaal, verteenwoordiger vir die Senekal-besigheidsforum, sê hulle vrees dat die waterreserwes gedurende die winter kan opdroog. “Ons gaan nie die winter deurgaan sonder ’n waterskaarste nie.”
Probleme vir boere
Boere in die distrik is nie regstreeks afhanklik van die dorp se watervoorraad nie, maar mnr. Martin Detering, streeksverteenwoordiger vir die VL, sê ’n waterskaarste sal wel ’n invloed op boere se bedrywighede hê. “Vat maar ’n boer wat op die dorp melk lewer, water is tog nodig om dit te doen. Dit kan beteken dat boere verder gaan moet ry om ’n afsetpunt vir hul produkte te kry.”
“Senekal is baie afhanklik van die landbou en sake in die dorp en op plase loop hand aan hand. Só ’n probleem gaan dus wye gevolge hê,” aldus Detering.
Rosendaldam-projek
Detering sê hulle kyk met groot afwagting na die Rosendaldam-projek wat die afgelope 10 jaar al voortsleep. ’n Omgewingsimpakstudie oor die projek is reeds afgehandel, maar daar word nie verder iets gesê oor wanneer bouwerk sal begin of die planne sal begin vorm aanneem nie.
Dié dam sal glo water aan onder meer Senekal, Rosendal en Ficksburg verskaf.
“Die kommer oor water strek wyd. Ons hoor van mense van Marquard en Clocolan wat ook bekommerd is. En dis nou winter, dit gaan nie binnekort genoeg reën om damme vol te kry nie,” vertel Detering.
Bron: Volksblad
