Minimale skade en veeverliese is deur boere ná die bitter koue weer in die Oos- en Wes-Kaap aangemeld. Een van die hoofredes daarvoor is dat boere betyds teen die ekstreme toestande gewaarsku is en voorbereidings kon tref, meen Agri Oos-Kaap.
Enkele veeverliese is by Agri Oos-Kaap se kantoor aangemeld, en tans staan die getal diere wat in dié provinsie gevrek het, op net meer as 20. Sommige boere het ook skade aan aanplantings wat langs riviere geleë is, aangemeld. Die kantoor wag tans op terugvoering uit dele van die provinsie wat kommunikasieprobleme ondervind.
Wes-Kaap
Intussen dui ’n opname deur Agri Wes-Kaap aan dat die meeste reën, 96mm, verlede week in die Riversdal-omgewing gemeet is. Ander dele, soos Franschoek en Ladismith, het oor die naweek tot 70mm reën gemeet.
In Piketberg en Malmesbury is onderskeidelik 4mm en 3mm reën oor die naweek gemeet. Geen veeverliese of ernstige skade is tot dusver in die provinsie aangemeld nie.
Die meeste sneeu het in die Karoo en Ladismith-omgewing voorgekom. “Agter die Klein-Swartberge in Vleiland is sneeu van tot 40cm diep aangemeld. Geen vloede is tot op datum aangemeld nie en ons raai die goeie sneeu in die berge het die vloei van riviere getem,” lui die opname.
Meer reën
Intussen sou die Vredendal-omgewing graag meer reën wou hê: “Weidings is nog baie droog en die manne wat op droëland gesaai het, se gesaaides lyk nie goed nie – hulle soek reën.”
Uit die Riversdal kom daar klagtes dat boere nie in hul saailande kan inkom vir bespuitings nie. Hulle word dus genoodsaak om lugbespuiting toe te pas. Die Sonderend- en Breërivier in die omgewing is redelik vol, maar hulle oorstroom nog nie hul walle nie.
