Die waarskynlikheid van reënval vir somergewasse lyk redelik goed, veral in Oktober en November asook rondom Februarie.
Mnr. Johan van den Berg, bestuurder van gespesialiseerde oesversekering by Santam Landbou, het by AMT se vooruitskouingskonferensie gesê verskeie modelle voorspel 'n swak El Niño-verskynsel of dalk selfs neutrale seetemperature in die Niño-gebiede van die Stille Oseaan.
Vroeër vanjaar is groter waarskynlikhede vir 'n El Niño voorspel, maar Van den Berg het gesê dié voorspellings is sedertdien aangepas.
Om seisoensvoorspellings vir Suider-Afrika te doen moet seetemperature in die Indiese Oseaan ook in ag geneem word. Weermodelle voorspel 'n neutrale tot negatiewe Indiese Oseaan Dipool-indeks. Dit beteken dat die normale reënvalpatrone nie te veel beïnvloed behoort te word deur gebeure in die Indiese Oseaan nie.
“Die Indiese Oseaan is dikwels verantwoordelik vir tropiese siklone wat in die kritieke maande van veral Januarie tot Maart voorkom en droogte veroorsaak oor die suidelike deel van Afrika.
“Dit beteken waarskynlik dat somerreënval vir die seisoen as geheel ná aan die langtermyn-gemiddeld behoort te wees. Daar gaan wel droër en warm tydperke wees, maar ook maande met bogemiddelde reenval.
“As 'n mens na die gesamentlike invloed van die neutrale tot negatiewe Indiese Oseaan Dipool-indeks en 'n swak El Nino kyk, is die verwagting oor die sentrale tot westelike dele van die land normale reënval in Oktober en die eerste deel van November, droër toestande in die tweede deel van November en Desember en eerste deel van Januarie, ten minste gemiddelde reënval in die laaste deel van Januarie en Februarie, en weer ondergemiddelde reënval in Maart en April.
“Vir die meer oostelike dele van die land lyk die patroon effens anders met redelike goeie reën wat verwag word in Oktober, November en selfs Desember, maar droër toestande rondom Februarie.”
Van den Berg sê dit lyk asof die reën vanjaar vroeër as die vorige paar jaar gaan begin met goeie tot selfs swaar neerslae wat verwag word in veral die middelste tot laaste deel van Oktober.
* Vroeër die week het prof. Peet Pienaar ’n droër somer voorspel.
