Só het mnr. André de Ruyter, uitvoerende hoof van Eskom, Maandag op ’n mediakonferensie oor die huidige stand van Suid-Afrika se kragnetwerk gesê.
Hy het onder meer gesê weerstoestande soos die hoë reënval in dele van Suid-Afrika en warm temperature in sommige provinsies het bygedra tot die besluit Sondagaand om beurtkrag tot vlak 6 te verhoog.
Daar is op die oomblik ’n tekort van 5 834 MW in die kragnetwerk. Vir elke 1 000 MW se tekort, word een vlak van beurtkrag ingestel om die kragnetwerk stabiel te hou, volgens De Ruyter.
Hy het benadruk Suid-Afrika se kragnetwerk is nie naby aan ’n totale ineenstorting nie. “Ons gebruik beurtkrag juis om ’n totale ineenstorting te voorkom.”
Vlak 8 nie voorsien nie
Eskom verwag ook nie dat dit sal nodig wees om in die nabye toekoms na vlak 8 te skuif nie, maar indien dit wel sou gebeur, is daar gebeurlikheidsplanne wat dan eers bekend gemaak sal word. Hy wou nie uitbrei oor wat hierdie planne behels nie.
Mnr. Thomas Conradie, Eskom se waarnemende van opwekking, het gesê die vloede en hoë reënval in die Vaalrivier-omgewing beïnvloed onder meer die Lethabo-steenkoolkragsentrale. Lethabo is in die noordelike deel van die Vrystaat en nie naby aan die steenkoolvoorsieningsnetwerke van Mpumalanga nie.
Volgens Conradie sukkel dié myn langs die Vaalrivier om steenkool aan die kragsentrale te lewer weens die reënval. “Daar is heelwat steenkool by Lethabo, maar dit is nou nat.” Hy sê die vervoer van steenkool na Lethabo is ook nie noodwendig die antwoord op die probleem nie aangesien vervoerde vragte ook die risiko loop om nat te word.
Planne vir die winter
Conradie het gesê Eskom gaan sy beplande instandhoudingswerk begin afskaal namate die kouer maande nader kom. “Koeberg 1 se opknapping sal soos beplan teen einde Junie afgehandel wees. Ons sal Koeberg se eenheid 2 eers einde Augustus uit diens neem vir dié eenheid se beplande opknapping.” Dit sal volgens De Ruyter Eskom help met die beskikbaarheid van elektrisiteit, maar nie noodwendig beteken beurtkrag sal as gevolg daarvan verlaag word nie aangesien die aanvraag tydens die wintermaande hoër is.
Volgens De Ruyter het Eskom nou die steun van die nasionale tesourie wat agter die kragreus staan met waarborge vir die lenings wat handelsbanke toestaan om diesel aan te koop. Hy het nie ’n spesifieke bedrag vir hierdie finansiering om diesel te verkry bekend gemaak nie. Eskom het vroeër gesê heelwat diesel is tot dusver in Februarie gebrand om beurtkrag op vlak 3 en vlak 4 te hou.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
