Die Suid-Afrikaanse oppervlakte waarop geneties gemodifiseerde (GM) mielies, sojabone en katoen geplant word, het verlede jaar met 16% tot 2,66 miljoen hektaar toegeneem. Volgens dr. Maneshree Jugmohan-Naidu, direkteur van landboubiotegnologie by die Departement van Wetenskap en Tegnologie, was Soedan die enigste ander Afrikaland waar GM gewasse verlede jaar geplant is.
Jugmohan-Naidu het by 'n mediakonferensie van die landboubiotegnologiebedryf (ABI) terugvoer gegee oor die 2016-verslag van die internasionale diens vir die verkryging van landboubiotegnologietoepassings (ISAAA). Sy het gesê GM saad is voorheen ook in Burkina Faso en Egipte geplant, maar tydelike terugslae het dit verlede jaar verhinder.
Aanplantings brei wêreldwyd uit
Internasionaal het 26 lande verlede jaar GM gewasse geplant en het die oppervlakte met 3% tot 185,1 miljoen hektaar gegroei. Buiten vir 2015, het die wêreldwye oppervlakte vir 20 jaar gegroei, in 12 jaar met dubbelsyfers.
Die lande met die grootste oppervlaktes is, in volgorde, Amerika (72,9 miljoen ha), Brasilië (wat met 11% tot 49,1 miljoen ha gegroei het), Argentinië (23,8 miljoen ha), Kanada (11,6 miljoen ha) en Indië (10,8 miljoen ha). Dié vyf lande se aanplantings het saam 91% van die wêreld s'n verteenwoordig.
In Asië en die Stille Oseaan-gebied het groei gewissel na gelang van omstandighede. In Indië en China is GM katoenaanplantings deur lae wêreldpryse benadeel. In die Fillippyne en Mianmar het die oppervlakte onder GM mielies gegroei danksy 'n hoër vraag na voer vir lewende hawe en pluimvee, asook gunstige weersomstandighede.
In Australië was laasgenoemde ook die geval ná twee jaar van droogte, wat gelei het tot groter aanplantings van katoen en kanola.
Biotegnologie veilig
Jugmohan-Naidu het gesê 2016 was 'n belangrike jaar omdat Nobelpryswenners vir die eerste keer 'n verklaring uitgereik het ter ondersteuning van biotegnologie en waarin hulle kritici daarvan veroordeel het.
Verder het Amerika se National Academies of Sciences, Engineering and Medicine 'n oorsig gepubliseer van 900 navorsingstukke oor biotegnologie sedert 1996. Hierin is bevind daar is geen verskil tussen die waarskynlik risiko’s vir menslike gesondheid en die omgewing wat GM gewasse en konvensionele gewasse daarstel nie.
“Biotegnologie-gewasse het nou vir meer as 20 jaar 'n onbevlekte rekord van veilige gebruik en verbruik,” het Jugmohan-Naidu gesê.
