Boere in Limpopo sal aanpassings móét maak, want dié provinsie word saam met Mpumalanga die meeste deur grondhervorming, asook water- en mynkwessies geraak, sê mnr. Francois van den Berg, voorsitter van Agri Limpopo.
Hy het op die organisasie se kongres buite Ohrigstad gesê die landbou sal in almal se belang deel van die oplossing moet wees vir landelike ontwikkeling.
“Die landbou kan met sy poel van kundigheid inderdaad ’n belangrike rol speel. Bykans 80% van alle huishoudings in Limpopo leef in voedselonsekerheid. Arm Suid-Afrikaners leef op R500/maand en het R5 per dag vir kos. Dit móét verander en baie gou.
“Hoe langer die situasie voortduur, hoe meer mense sal die platteland verlaat en stede toe trek waar hulle nog minder vir hulself kan sorg. Boere kan ’n belangrike rol speel om probleme te help oplos,” het hy gesê.
Mnr. Corwyn Botha, besturende direkteur van Kaap Agri, sê ’n “energie-ontploffing” en die regte gesindheid is nodig om te doen wat gedoen moet word en te kry wat die landbou nodig het.
Hy het aan boere gesê hulle moet kies wat hulle wil bereik. “Waarvoor wil jy eendag onthou word?”
“Mense vergeet gou wat iemand sê, maar onthou lank hoe hy hulle laat voel,” het hy gesê. Boere se bydrae is om die nasie elke dag te versorg. Hulle moet erkenning kry daarvoor en die man op straat moet wéét van hulle.
8 November 2010
