Agri Wes-Kaap is “besonder dankbaar” vir die ekstra droogtehulp wat mnr. Pravin Gordhan, Minister van Finansies, vandeesweek in sy mediumtermyn-begrotingsraamwerk aan dié provinsie belowe het.
Luidens ‘n verklaring sê die organisasie hoewel die meeste dele van die provinsie al welkome reën gehad het, is dié reën steeds nie genoeg om die droogte te breek nie.
“Die gunstige uitwerking van die droogtehulp is onder meer om boerderypraktyke lewensvatbaar te hou, die plaaslike ekonomie aan die gang te hou en veral bestaande werksmag te behou,” sê mnr. Carl Opperman, hoof uitvoerende beampte van Agri Wes-Kaap.
Die beloftes
Luidens ‘n vroeëre berig op landbou.com het Gordhan R50 miljoen bygevoeg tot die droogtehulp aan die Eden-distrik, wat George insluit. Hy het ook R92 miljoen aan die Mosselbaai-munisipaliteit bewillig vir droogtehulp.
Op nasionale vlak het Gordon R363,2 miljoen bewillig vir onvoorsienbare en onvermydelike uitgawes soos natuurlike rampe en die uitbreek van siektes. Provinsies het ook R214,4 miljoen by hul ramphulptoelae bygekry, om paaie wat deur oorstromings beskadig is, te herstel.
Onderverdeling
Opperman sê hy waardeer ook die volgehoue ondersteuning wat hulle van mnr. Gerrit van Rensburg, Wes-Kaapse Minister van Landbou, asook mnr. Andre le Roux van dié departement, en sy span, kry.
“Die toepassing van die finansiering gaan baie spesifiek uitgevoer word en ons gaan saam met die departement werk om die proses so doeltreffend moontlik te laat verloop. Die hoofdoel is om die maksimum waarde toe te voeg en soveel moontlik boere in die Suid-Kaap te help,” verduidelik Opperman.
29 Oktober 2010
