Danksy verspreide reën kon die somerplanttyd in die weste volstoom begin, maar in Mpumalanga, waar die optimale planttyd tot middel November is, hou talle boere nog ’n besorgde oog op die weervoorspelling.
Neerslae oor dié provinsie was tot dusver kol-kol en die grootste deel was teen middel van verlede week nog sleg droog. Die week van 10 tot 16 November is derhalwe maak-of-breek-tyd vir boere.
Vooruitsigte vir verdere reën die volgende twee weke het darem teen verlede week belowend gelyk vir die grootste deel van die somerreëngebied, insluitend die ooste.
Die weer sal na verwagting in die komende weke die oorheersende dryfveer op die graanmarkte wees. Die onsekerheid daaroor, veral in Mpumalanga, het reeds die laaste tyd saam met ’n swak rand redelike steun aan veral die geelmielieprys gegee.
Die eerste noemenswaardige lentereën het ook groot verligting vir veeboere gebring. In groot dele van die Oos-Kaap is al stewige totale aangeteken. In dele van die Boesmanland waar die veld al baie swart was, het die reëntyd ook baie goed begin, met neerslae van tot 50 mm, berig Amelia Genis.
Wat die res van die seisoen betref, meen die internasionale ghoeroes die El Niño-spook loop nog. Die jongste verwagting is dat ’n amptelike El Niño-verskynsel teen vroeg volgende jaar kan begin geld, sê die Australiese Buro vir Meteorologie. Dié instelling voorspel ’n kans van minstens 50% op ’n swak tot middelmatige El Niño-verskynsel.
Die Departement van Landbou, Bosbou en Visserye waarsku ook in sy jongste klimaatverslag oor die moontlikheid van ondergemiddelde reënval teen middelsomer. Boere word gemaan om nie hul veld se drakrag met te groot veeladings te oorskry nie.
Bogemiddelde reënval word wel vir sekere gebiede in die vroegsomer verwag, maar die modelle wys uit dat dié voorspelling redelik onseker is.
* Kyk na die satellietfoto van die weer oor SA: Klik op die foto van die aardbol en wag dat dit oopmaak. Die foto word verskeie kere deur die dag verfris.
