Die uitvoer van plaaslike wyn het in die eerste drie maande van die jaar met 21% geklim.
Dit wil-wil lyk of boere beter pryse in die toekoms kan verwag. “Daar is ’n groeiende konsensus dat die internasionale wynaanbod na ’n beter balans beweeg.
Dit beteken dat pryse oor die volgende paar jaar sal styg,” sê mnr. André Morgenthal, kommunikasiebestuurder van Wines of South Africa (Wosa). Morgenthal skryf die toename in uitvoer toe aan die swakker rand.
“Die internasionale ekonomie is steeds onder druk, maar mense kry beter pryse as die wisselkoers gunstiger raak,” sê hy. Volgens hom is daar steeds ’n sterk vraag na rooi kultivars.
Die styging is ook grootliks aangevuur deur die verkope van grootmaatwyn. Die uitvoer van gebottelde wyn het in veral Oos-Afrika, Rusland en Japan gegroei. In Japan is duur, eksklusiewe wyn veral gesog.
Dit gaan nog swaar in die tradisionele markte, soos Brittanje en Nederland. Slegs Duitsland het groei getoon. Volgens me. Su Birch, uitvoerende hoof van Wosa, hou Nigerië geleenthede vir die bedryf in.
Die volume wyn wat vanaf 2007 tot verlede jaar na Nigerië uitgevoer is, het teen ’n saamgestelde koers van 24,1% gegroei. Die Nigeriese wynmark word op sowat $300 miljoen beraam en en sal met ’n beraamde $70 miljoen oor die volgende drie jaar groei.
Morgenthal meen Suid-Afrika moet fokus op wyn met middel- tot hoë pryspunte as daar na Nigerië uitgevoer word.
26 April 2012
