Wildboere in die Soutpansberg is die josie in oor ‘n spoorlyn wat Coal of Africa (JSE: CZA) oor nege plase beplan.
Luidens ‘n berig op Fin24.com het die maatskappy Donderdag, 19 April 2012, sy planne tydens ‘n vergadering vir belangstellendes in Johannesburg bekend gemaak.
Die spoorlyn sal hoofsaaklik noord van die Soutpansberg opgerig word en die begroting daarvoor is R300 miljoen. Me. Marietjie Eksteen, die maatskappy se omgewingskonsultant, sê die spore vir die projek sal sowat R22,5 miljoen kos en oor vier wildplase gelê word.
Die Makhado-projek is onderneem om steenkool na Arcelor-Mittal SA (JSE: ACL) in Vanderbijlpark te vervoer.
Uitwerking op migrasie van wild
Volgens die berig is boere moeilik oor die invloed wat die spoorlyn op natuurlike migrasie van die wild op hulle plase sal hê. Verder is hulle bekommerd oor die effek op die waarde van hulle grond en hulle lewensgehalte.
Van die boere is van plan om die planne teen te staan, en dié saak sal na verwagting in die hof eindig.
Intussen sê Eksteen die oprigting van die spoorlyn sal beteken dat sowat 400 inheemse bome, waarvan verskeie beskermde spesies is, verwyder sal moet word. Die maatskappy het aansoek gedoen om permitte om die bome te verwyder, en is verder ook van plan om wildsheinings langs die spoorlyn op te rig.
Die maatskappy het vir ‘n mynpermit en ‘n waterlisensie aansoek gedoen en hoop om vroeg in 2013 by Makhado te kan begin myn.
Bron: Fin24.com
21 April 2012
