Die uitsetting van wit boere, hetsy gewelddadig of per hofbevel, en dreigemente van uitsettings, duur voort in Zimbabwe.
Die Commercial Farmers’ Union (CFU) se syfers toon egter dat daar nie, soos onlangse mediaberigte gelui het, vanjaar ’n groot styging in voorvalle is nie.
’n Swart boer en leier van ’n opposisieparty is glo die enigste swart persoon wat tot dusver geteiken is.
Verskeie CFU-amptenare het in antwoord op Landbouweekblad se vrae, syfers bymekaar gesit waarvolgens daar van Januarie tot September vanjaar agt gewelddadige uitsettings op plase was en ses wat kragtens hofbevele plaasgevind is.
Vir die ses jaar vanaf 2009 was daar altesame 147 gewelddadige uitsettings en 78 per hofbevel, wat ‘n jaarlikse gemiddeld van onderskeidelik sowat 24 en 13 beteken, en daar was vanjaar al 72 dreigemente van uitsettings, met die totaal vir ses jaar 471.
“Daar was die afgelope paar maande geen sigbare toename in plaasbesettings nie. Die afgelope drie maande was daar geen uitsettings nie, wel ‘n paar pogings tot gewelddadige uitsettings,” sê die organisasie, wat nou 500 lede het van wie net ‘n derde nog boer.
Volgens die CFU word die uitsettings meestal deur LP’s, ander politici, hoofmanne, en senior staatsamptenare, weermag- en polisielede gedryf. Almal wil om opportunistiese redes meer plase hê.
* Mnr. Hendrik Olivier, hoof uitvoerende beampte van die CFU, het op Agri SA se jaarkongres dié organisasie gelukgewens met sy raamwerk vir grondhervorming. “Ek hoop jul Regering gaan hierop inkoop en dat lesse uit buurstate soos Zimbabwe geleer kan word.”
