Die wolmark het die prysvlakke van die vorige veiling gehandhaaf en Cape Wools se Merino-aanwyser het met 'n geringe 0,6% gestyg tot R114,68/kg (skoon). Dit is 2,7% hoër as die openingsveiling en 2% hoër as die ooreenstemmende verkope van die vorige seisoen.
Me. Ria van Rooyen, wolwaardeerder van Cape Wools, sê kopers was dit eens dat die plaaslike mark grotendeels sterker vertoon het slegs as gevolg van die ondersteuning van 'n swakker rand. In terme van buitelandse valuta was die mark egter onder druk as gevolg van 'n trae vraag uit China.
Die rand het 1,7% teenoor die Amerikaanse dollar verswak, vergeleke met die gemiddelde koers op die vorige week se veiling en het op R11,10 gesluit. 'n Verkoopspersentasie van 97 is behaal van die 7 324 bale wat op die veiling aangebied was. Die grootste kopers op die veiling was Lempriere SA (2 290), Standard Wool SA (2 029) en G Modiano SA (1 033).
Die gemiddelde skoonwolpryse vir die seleksie binne die verskillende kategorieë goeie, lang kamwoltipes (MF5) was soos volg: 18 mikron daal met 0,8% tot R124,10/kg, 19 mikron verswak met 0,4% tot R118,15/kg, 20 mikron styg met 0,2% en sluit op R115,32/kg, 21 mikron versterk met 0,9% en sluit op R113,81/kg en 22 mikron styg met 2,5% tot R113,64/kg.
Die volgende veiling is op 1 Oktober wanneer sowat 6 700 bale onder die hamer kom.
