Wolpryse het effens teruggesak op die weeklikse veiling nadat dit verlede week rekordvlakke bereik het en Cape Wools se Merino-aanwyser het met 2,4% gedaal tot R102,65/kg (skoon).
Dit kan ’n aanduiding van weerstand vanuit sekere sektore teen die hoë prysvlakke wees. Daarbenewens het rand met 1,1% teenoor die Amerikaanse dollar versterk, wat die mark ook effens onder druk geplaas het.
Die pryse van feitlik alle kategorieë vagwol het gedaal, maar die grootste dalings is in kategorie vir 20 mikron aangeteken, wat met meer as 5% teruggesak het. In Australië het die mark ook ná verlede week se styging verswak.
Wolontvangste by makelaars tot datum is 9,3% laer as in die ooreenstemmende tydperk verlede seisoen, wat ’n aanduiding kan wees dat produksie dié seisoen gaan daal.
Dit was weer ’n groot veiling met 13 968 bale waarvan 92% verkoop is.
Die gemiddelde skoonwolpryse van lang, kamwoltipes (MF5) van gehalte was soos volg: 19 mikron verswak met 3,4% tot R116,96/kg, 20 mikron was 5,7% goedkoper op R108,12/kg, 21 mikron verswak met 3,9% tot R105,19/kg en 22 mikron daal met 3,5% tot R103,82/kg.
Sowat 10 000 bale kom volgende week onder die hamer.
18 Januarie 2012
