’n Sterker rand kon die wolmark nie op dié week se veiling stuit nie en Cape Wools se Merino-aanwyser het met 2,3% tot R104,17/kg (skoon) gestyg.
Hoewel die aanwyser net onder die hoogtepunt van die seisoen is, is dit steeds 22% hoër as op dieselfde veiling verlede seisoen.
Die rand het die afgelope week met 1,1% teenoor die Amerikaanse dollar versterk, maar dit het weinig invloed op pryse gehad. Dit was ’n heelwat kleiner aanbod van net 7 274 bale, maar ’n hoë verkooppersentasie van 99% is behaal.
Meer wol het die afgelope tyd na die mark gestroom en wol-ontvangste by makelaars se pakhuise staan nou op 36,5 miljoen kg, wat net 3% laer is as vir die ooreenstemmende tydperk verlede seisoen. Dié verskil was tot onlangs nog heelwat groter, wat kommer laat ontstaan het dat produksie dié seisoen weer heelwat kan teruggesak.
Pryse vir feitlik alle lang vagwol het verbeter, maar die grootste stygings was vir 19 tot 20 mikron.
Die gemiddelde skoonwolpryse van lang, kamwoltipes (MF5) van gehalte was soos volg: 19 mikron styg met 1,1% tot R115,69/kg, 20 mikron was 1,5% duurder op R110,49/kg, 21 mikron verstewig met 0,5% tot R106,57/kg, maar 22 mikron sak met 1,6% terug tot R101,98/kg.
Geen veiling is vir volgende week geskeduleer nie weens die openbare vakansiedag. Velings hervat weer op 28 Maart.
15 Maart 2012
