Wolpryse het weer ’n skerp styging op dié week se veiling aangeteken en Cape Wools se Merino-aanwyser het met 5,6% tot R68,66/kg (skoon) gestyg.
Dit is nie net die hoogste vlak vir die seisoen nie, maar is ook 19% hoër as die openingsvlak en 16% hoër as dieselfde veiling verlede seisoen.
Die voortgesette lae voorraad in die woltekstielketting en kommer oor die aanbod is van die faktore wat die prys aandryf. Volgens die jongste produksieskattings gaan die wêreld se wolvoorraad onder druk bly omdat produksie in die meeste woluitvoerlande weer gaan daal.
In Australië het pryse ook skerp gestyg en het die markaanwyser ook ’n hoogtepunt vir die seisoen bereik.
Die pryse van alle langwol het gestyg, maar die grootste stygings was in die fyner kategorieë met 19 mikron wat met meer as 8% verbeter het. Die hoogste prys van R87/kg is betaal vir ’n baal van 17,4 mikron wat deur Perdeberg Boerdery verkoop is.
Altesame 9 306 bale is aangebied waarvan 99% verkoop is.
Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron styg met 8,2% tot R86,78/kg, 20 mikron verbeter met 4,3% tot R72,37/kg, 21 mikron styg met 4,3% tot R68,48/kg en 22 mikron was 3,1% duurder op R65,66/kg.
Sowat 12 000 bale kom volgende week onder die hamer.
10 November 2010
