Veilings hervat Woensdag (12 Januarie) wanneer sowat 12 000 bale wol per veiling in Port Elizabeth aangebied sal word.
Ontleders is vol vertroue dat die mark sy goeie vertoning van die afgelope paar maande sal voortsit en dat die vraag na wol goed sal bly. Cape Wools se Merino-aanwyser het op die laaste veiling voor die Kersreses met 3,7% gestyg. Dit was 9% hoër as met die openingsveiling in Augustus verlede jaar.
Sommige ontleders meen dat die mark dieselfde patroon as verlede seisoen kan volg toe pryse stewige stygings op die eerste veiling ná die Kersreses aangeteken het.
Na verwagting sal die sterk vraag na veral die fyner tipes wol (19,5 en fyner) voortduur in die lig van die sterk vraag uit Italië en van ander Europese verwerkers.
Van die faktore wat in wol se guns tel, is die goeie vraag na natuurlike vesels en die voortgesette daling in die wêreldaanbod van kleedwol. In Australië, die wêreld se grootste produsent van kleedwol, het produksie verlede seisoen tot sy laagste vlak in 80 jaar gedaal en op 343 miljoen kg te staan gekom. Dit sal in die huidige seisoen na verwagting met ’n verdere 2,3% tot 335 miljoen kg daal.
Suid-Afrika, die naasgrootste produsent van kleedwol, is een van die min woluitvoerlande waarvan produksie die afgelope paar seisoene standvastig rondom 48 miljoen kg gebly het.
Ontleders waarsku egter dat ’n mate van wisselvallig in die mark verwag kan word en dat wisselkoerse ook ’n rol kan speel.
10 Januarie 2010
