Luidens ’n inskrywing op Vinpro se Facebookblad het Hughes (84) sy merk op die Suid-Afrikaanse wyngemeenskap gelaat en was hy bekend om sy nederigheid ten spyte van sy verskeie prestasies.
“Die wyngemeenskap is beslis armer ná sy heengaan, maar was ryklik geseënd om hom en sy blywende bydrae te kon hê. Hy sal ’n leemte laat en baie gemis word deur die duisende wie se lewens hy op sy unieke, sagte manier aangeraak het. Mag hy rus in vrede.”
Hughes is op 12 Junie 1938 in die Gatooma-distrik in Zimbabwe (destyds Rhodesië) gebore. Sy loopbaan, wat uit wynmaak, distillering, joernalistiek, konsultasiewerk en die beoordeling van internasionale wyne en spiritus bestaan het, het in 1956 by African Distillers begin.
Nadat hy na Suid-Afrika verhuis het, het hy tot 1989 verskeie poste by Stellenbosch Farmers Winery (nou Distell) beklee, onder meer bedryfsbestuurder en streeksbestuurder van verskeie streke. Daarna het hy onafhanklik en as vryskut gewerk.
Hy was by die Nederburg-veiling betrokke sedert dit in 1974 die eerste keer aangebied is. Hy het die Kaapse Wynakademie in 1979 op die been gebring en me. Phyllis Hands as eerste hoof aangestel.
Hughs het verskeie toekennings tydens sy loopbaan ontvang en is genooi om by gesogte organisasies aan te sluit. Hy was in 2001 onder meer die eerste nie-Britse ontvanger wat deur die International Wine and Food Society genooi is om by die Worshipful Company of Distillers aan te sluit. Hy het ook verskeie boeke oor wyn en die plaaslike wyn- en spiritusbedryf geskryf.
Hughes en sy vrou, Lorna, het op die Stonehill-wynlandgoed in die Devonvallei by Stellenbosch gewoon. Lorna, gewese hoofbestuurder van die Stellenbosse Dieresorgvereniging en ’n bekende in die Stellenbosse wynbedryf, is verlede jaar Augustus in ’n botsing oorlede.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
