Wynboere wat ongelukkig is oor die pryse wat restaurante vir wyn vra, het nie ’n begrip van die restaurantbedryf nie, meen mnr. Alan Pick, eienaar van The Butchers Shop & Grill in Sandton.
Die restaurant verkoop tussen 600 en 800 bottels wyn per dag. Dit spog met ’n indrukwekkende wynlys met wyne wat tot R5 000 per bottel kos. Die restaurant verkoop wyn en vleis wat in die restaurant gedrink en geëet kan word, maar ook weg van die perseel geniet kan word.
“Dit gaan oor wáár jy jou in die mark posisioneer en ons is in die premiumkant van die mark. Dit beteken ons het massiewe oorhoofse koste. Sekere prysverhogings moet geld om seker te maak ons onderneming is volhoubaar,” het Pick vanoggend by Wynkelders SA se kongres op Stellenbosch gesê.
“Daar is ’n wanopvatting, want die produsent weet wat dit hom kos om die wyn te produseer en hy verstaan nie waar die gaping tussen produsenteprys en kleinhandelaarsprys vandaan kom nie.”
Die een ding wat boere en sakemanne soos Pick egter in gemeen het, is dat albei Handelsmerk SA (Brand SA) probeer verkoop.
“Ons verkoop nie wyn nie, ons verkoop die oomblik,” meen hy.
“Dit gaan oor bemarking en jou posisionering in die mark. Dit lyk nie vir my die wynbedryf verstaan dit nie.”
Hy sê Suid-Afrikaanse wyne in Amerika se beste steak houses in Las Vegas kos $120 tot $140 per bottel, maar die internasionale eweknieë se pryse begin by $500 per bottel. Sowat 60% van die rooiwyn wat in die Amerikaanse kleinhandel verkoop word, word in steak houses van die hand gesit.
“Dit ontstel my altyd dat daar miskien vier Suid-Afrikaanse wyne op die wynlyste is, maar die werklikheid is dat klante se indrukke hulle daarvan weerhou om $120 per bottel te betaal.
"Ons moet weer gaan dink oor die pryse wat ons op sekere markte kan behaal. Ons moet $400 per bottel vra op sekere markte!”
Pick sê hy het begrip vir boere se ongelukkigheid, maar meen wynboere verstaan nie hoeveel klante bereid is om te betaal nie. “Ons moet almal saam werk om Handelsmerk SA te verkoop. Tans is daar geen samehorigheid nie en ons skiet ons self in die voet.”
3 Mei 2012
