Zeder Beleggings, die genoteerde agri-beleggingsmaatskappy wat hom spesifiek op die voedsel- en dranksektor toespits, se aanbod aan Agri Voedsel-aandeelhouers om hul aandele vir Zeder-aandele te verruil, is met 'n oorweldigende meerderheid van 86,2% aanvaar.
Dit volg nadat Zeder, wat reeds 'n belang van 48,5% in die maatskappy het, onlangs aangekondig het dat hy 'n aanbod aan Agri Voedsel se minderheidsaandeelhouers gaan doen in 'n verhouding van 16,2 Zeder-aandele vir een Agri Voedsel-aandeel.
Altesame sowat 4 500 Agri Voedsel-aandeelhouers, hoofsaaklik boere, is by die transaksie betrokke, wat R2,7 miljard bedra.
Mnr. Norman Celliers, uitvoerende hoof van Zeder, het ná 'n aandeelhouersvergadering op Somerset-Wes in ’n nuusverklaring sy waardering vir die oorweldigende ondersteuning teenoor Agri Voedsel-aandeelhouers uitgespreek.
“Dit was 'n lang proses en vandat die transaksie aangekondig is, is boere is wyd en syd daaroor ingelig. Alle vrae is deurlopend beantwoord.
'n Administratiewe proses sal nou volg vir die uitruil van die aandele. Agri-Voedsel-aandeelhouers kan Zeder se webwerf by www.zeder.co.za besoek, of www.kaapagri.co.za vir inligting rakende belangrike datums en tye.
