Groot kommer heers onder Zimbabwiese boere oor ‘n moontlike toename in intimidasie op plase weens die anderende verkiesing.
Mnr. Deon Theron, voorsitter van die Commercial Farmers’ Union (CFU), sê hoewel intimidasie van boere die afgelope paar weke weer toegeneem het, is dit tans stil. “Al wat ons op die oomblik optel, is dat daar baie druk op veral plaaswerkers is om van plase af pad te gee. Wat ons wel bekommerd maak is as die polisie begin sê hulle kan niks doen nie, want dit is ‘n politiese saak. Dit gee die besetters ‘n lisensie om te doen wat hulle wil en dit laat jou as boer letterlik alleen,” vertel Theron.
Zanu-PF se konferensie
Theron sê pres. Robert Mugabe se Zanu-PF party hou volgende maand sy amptelike konferensie, en boere sal hopelik daarna weet wat die planne rondom die plaasbesettings is. “Hulle sal dan seker besluit hoe om hulself te posisioneer, en hoe hulle moet hardloop met die ding en wat hulle wil doen.”
Die land se verkiesing sal na verwagting in Junie volgende jaar plaasvind, en Theron sê tans blyk dit of die party veral die jeug gebruik om sy veldtogte te dryf. “Dit lyk of hulle ook die kerke wil insleep.”
Huis se slotte verander
Intussen het Theron sy eie plaas verloor toe besetters hom en sy familie onlangs van die plaas afgedwing het. “Hulle het intussen in ons huis ingebreek, ons goed eenkant toe geskuif, hulle goed ingetrek en die slotte op die deure verander sodat ons nie in die huis kan in nie.”
Sowat 600 stuks vee is steeds op die plaas, en Theron sê hoewel hy nog nie van die diere verloor het nie, is die hele plaas afgebrand en voer hy tans ‘n finansiële oorlewingstryd aangesien hy vir die diere voer moet aankoop. “Ek is ook bekommerd dat hulle my werkers van die plaas af gaan dwing, aangesien hulle tans geïntimideer word, want hulle help my baie met die vee.”
Stilte oor probleem
Intussen berig The Zimbabwean dat boere in dié land glo bekommerd is omdat dit voorkom asof stilte heers weens vrees oor die besetting van plase, intimidasie van boere en aanranding van werkers. Mnr. Ben Freeth, ‘n boer van Chegutu wie se plaashuis deur besetters afgebrand is, sê hy meen die ware gebeure – dat plaaswerkers aangerand word, vee by die honderde gesteel word en beamptes plase in veral die Chipinge-omgewing beset – word nie openbaar gemaak nie.
Volgens Freeth is ‘n vrou van Zimbabwe, wat erken het dat sy al 10 mense tydens twee besettings aangerand het, vir amnestie in Brittanje aansoek gedoen. ‘n Hooggeregshof het egter bepaal dat sy haar aan misdade teen die mensdom skuldig gemaak het. Sy moet glo na Zimbabwe teruggestuur word, maar dit is nie duidelik of sy vervolg sal word nie.
9 November 2010
