Intimidasie op plase in Zimbabwe neem toe met volgende jaar se naderende verkiesing in dié land, sê die Commercial Farmers’ Union (CFU).
Mnr. Deon Theron, voorsitter, sê die oorblywende boere in Zimbabwe word op ‘n gereelde basis deur plaasbesetters geïntimideer. “Dit is asof die intensiteit daarvan die afgelope paar weke weer toegeneem het.”
Theron sê daar heers veral kommer oor die Zimbabwiese polisie se houding oor die onlangse voorvalle. “Die polisie is nou weer in daai fase waar hulle sê hulle kan niks aan die voorvalle en die besetters doen nie, want dit is polities.”
Self van plaas verjaag
Theron en sy familie is self onlangs van hulle plaas verjaag. “Ek het twee plase, en is ‘n geruime tyd terug al van dié plase afgejaag. Intussen het ons op my ma se plaas geboer, maar ons is so twee weke terug ook van dié plaas verjaag.”
Sowat 400 beeste en 200 skape is nog op die plaas, en Theron sê die besetters het intussen die hele plaas afgebrand en hy moet tans voer vir sy vee aankoop. “Hulle het ons meubels in die huis eenkant toe geskuif en hulle eie meubels ingetrek. Ek is egter baie bekommerd, want hulle terroriseer tans die werkers op die plaas, en as die werkers die plaas verlaat het ek groot probleme met my vee.”
Theron en sy familie gaan tans in Harare tuis.
Vermoorde boer begrawe
Intussen word mnr. Kobus Joubert, ‘n tabakboer van Chegutu wat onlangs vermoor is, Maandag (1 November) begrawe.
Hy is een van sowat 20 boere wat die afgelope 10 jaar in Zimbabwe vermoor is. Die aanval was na verwagting eerder misdaad verwant as polities van aard. “Na die voorval wil ons weer ons simpatie met Suid-Afrika se boere uitspreek wat so gereeld op hulle plase vermoor word,” sê Theron.
2 November 2010
