’n Moratorium op alle plaasbesettings in Zimbabwe en die vervolging van boere word dringend deur die Commercial Farmers’ Union (CFU) aangevra.
Luidens ’n verklaring volg dié versoek ná ’n boer verlede week in ’n vermeende rooftog op sy plaas wreed vermoor is.
“Ons versoek dat ’n moratorium op alle uitsettings en vervolgings geplaas word, sodat die paar kommersiële boere wat nog op hul plase kan wees in vertroue saam met hul finansiële vennote kan boer terwyl oplossings gevind word,” lui die verklaring.
Teikens
Die organisasie sê hulle het ná die voorval verlede Vrydag (2 September 2011) ’n kennisgewing aan al hul lede gestuur om hulle te waarsku teen enige verdagte optrede en mense op hul plase.
“’n Boodskap is aan ons boerderygemeenskappe gestuur dat ons teikens is en dat ons teikens gaan bly en dat dié misdadigers kan optree sonder om vervolg te word. Hulle is ’n simptoom van wat toegelaat is om oor die afgelope 12 jaar met ons gemeenskap te gebeur en wat steeds voortgaan,” sê die CFU.
Volgens die organisasie het hy die Zimbabwese regering verder versoek om veiligheid en orde in die landboubedryf te herstel. Die regering is gevra om ’n platform vir debattering oor moontlike oplossings daar te stel.
“Ons vra verder hoekom dit toegelaat word dat dié situasie voortgaan. Ons is almal Zimbabwiërs en wil net die beste vir die land hê. Hierdie afgryslike aanvalle is totaal onnodig en afbrekend en ons land kan dit nie bekostig om dié pad te loop nie,” eis die CFU.
7 September 2011
