Hy bevestig dat ten minste een wit Zimbabwiese boer toegelaat is om na sy grond in dié land terug te keer, sê mnr. Herbert Murerwa, Zimbabwiese landbouminister, luidens ‘n berig op Newzimbabwe.com.
Die betrokke boer se naam kan nie bekend gemaak word nie aangesien kommer heers dat oorlogsveterane hom sal aanval. “Ja, ek kan bevestig dat ons verlede jaar ‘n plaas aan ‘n wit kommersiële boer teruggegee het. Die rede hiervoor is dat die swart boer op dié grond glad nie geboer het nie,” sê Murerwa.
Hy het ook diegene gewaarksu wat die Zimbabwiese regering se benadering tot gevalle soos dié nie ernstig opneem nie. “Ons sal plase terugneem as hulle niks daarop doen nie en net alles van die regering verwag.”
Pres. Robert Mugabe was onlangs ontstoke oor nuwe swart boere wat hul grond aan wit boere verhuur en dan in die winste deel. Sowat 120 afgesette wit boere is as deel van ooreenkomste soos dié weer terug op hul plase.
Nuweling boere vind dit moeilik om hul plase aan die gang te kry aangesien banke grootliks huiwerig is om finansiering aan hulle toe te staan.
4 Januarie 2011
