Tevredenheid heers nadat plaasmoorde in Suid-Afrika Woensdag (29 September) in die Europese Unie (EU) se parlement deur ‘n Vlaamse lid, mnr. Philip Claeys, opgehaal is, sê die TLU SA.
Luidens ‘n mediaverklaring is die organisasie verheug hieroor.
“Ons is baie bly dat die moorde op ons boere nie langer op wêreldforums geïgnoreer kan word nie, en dat die wêreld nou al hoe meer kennis begin neem daarvan,” sê mnr. Ben Marais, voorsitter.
Zuma gekonfronteer
Claeys het pres. Jacob Zuma tydens sy besoek aan die parlement oor plaasmoorde in die land gekonfronteer.
“Mnr. Claeys sê dat daar in die EU groot kommer bestaan oor die feit dat sowat 3 000 plaasbewoners reeds vermoor is, en dat die leier van die ANC se jeugbeweging steeds liedjies soos ‘kill the boer, kill the farmer’ sing. Hy wou by Zuma weet wat hy beoog om daaraan te doen,” lui die verklaring.
Boere is tevrede?
Zuma het geantwoord dat plaasmoorde deel is van die misdaad in die land, maar dat die Polisie en boere met mekaar in gesprek is, en dat die boere tevrede is.
“Ons wil baie dankie sê aan mnr. Claeys en Vlaams Belang dat hulle die geleentheid gebruik het om dié saak op ’n belangrike forum soos die EU-parlement te opper. Ons is egter bitter ontevrede met pres. Zuma se antwoord, want die boere is nié tevrede nie. Solank daar deurentyd aanvalle op plase voorkom, soos daar dié week weer gebeur het, sal die boere ontevrede bly en word die saak allermins as opgelos beskou,” sê Marais.
1 Oktober 2010
