“Ons sal graag wil sien dat pres. Zuma en sy Regering die eerste voorbeeld stel in hierdie verband neem, naamlik om dan ook die rassepolitiek te stop,” sê die TLU SA se voorsitter, mnr. Louis Meintjes.
“Solank beskuldigings van regeringskant gemaak word aan die deur van een rassegroep, soos dat hulle grond gesteel het wat teruggegee moet word, en dat Jan van Riebeeck die oorsaak is van al die ellende in die land, gaan die rasgevegte bly voortbestaan.
“Maar meer nog, is rasgebaseerde wetgewing, gegrond op politieke ideologie eerder as die vryemarkbeginsels, die grootste oorsaak van rassespanning en rasgevegte,” sê Meintjes in ’n nuusverklaring.
Hy sê die Regering behoort alle rasgebaseerde wetgewing te skrap, as hy wil begin met die uitskakeling van rasgevegte. “Dit sal wetgewing en prosesse insluit, soos grondhervorming, regstellende optrede, swart ekonomiese bemagtiging, kwotastelsels in sport en gedwonge transformasie in skole en universiteite. Solank daardie onbillike rasgebaseerde wetgewing op die wetboeke is, sal Zuma se pleidooi op dowe ore val,” sê Meintjes.
Die kulturele diversiteit van Suid-Afrika is 'n gegewe en daar behoort eerder gefokus te word om erkenning te gee aan kulturele groeperinge waar hulle hul eie waardes kan uitleef. So 'n stap sal veel eerder bydra tot wedersydse begrip en respek as die huidige verswelging van die een kultuur oor die ander.
